Friday, March 11, 2011

ప్రియతమా...

ఇది మాయ చేసావే చిత్రం లోని నాకు ఎంతో ఇష్టమైన పాట ఆంధ్రీకరణ..
http://www.youtube.com/watch?v=4a1_w6bY428

Vamalayenthi Varum Thennal, (O..Breeze blowing through the mountains.)
గిరుల పై సాగు మృదు పవనమా..
Puthu Manavalan Thennal, (O..Breeze, decked up like a bridegroom)
వధువు గా మారినావా ఇలా.....
Palli Medayae Thottu Thalodi Kurushil Thoyuthu Varumbol, (Coming after worshipping the cross at the altar..)..
ప్రభు సేవ నుంచి ...నను చేర వచ్చినావ పరుగున...

Varavelpinu Malayala Kara Manasammatham Choriyum, (O Land of Kerala….grant permission for welcoming it..)
తన రాకయే కేరళ... మనసంతను నిండగా....
Aaromalae, Aaromalae, Aaromalae, Aaromalae…. (O Beloved….O Beloved…O Beloved…..O Beloved…)
ప్రియతమా... ప్రియతమా... ప్రియతమా... ప్రియతమా...!!!

Swasthi Swasthi Su Muhurtham, (On this very auspiciousness occasion )
స్వస్తి స్వస్తి సుముహుర్తం..
Sumungali Bhava Manavatti (O Bride..,May you be blessed with a long wedded life)
సుమంగళి భవ.. మానవతి..
Swasthi Swasthi Su Muhurtham, (On this very auspiciousness occasion )
స్వస్తి స్వస్తి సుముహుర్తం..
Sumungali Bhava Manavatti (O Bride..,May you be blessed with a long wedded life)
సుమంగళి భవ.. మానవతి..

Shyama Rathri Than Aramanayil, (In the inner sanctum of the dark evening…)
తారలే మురిసే తరుణం..
Mari Nilkayo Tharakame, (O star..why are you so reserved ? )
ఏల నీ మోవి పై మౌనం...
Pulari Manjillae Kathiroliyay, (Like a ray of light in the morning mist,)
ఉదయ భానుని కాంతి వలె
Akalae Nilkayo Penmaname, (Are you standing afar…my lady ?)
నిలచినావేల నా చెలియా..

Chanju Nilkuma Chillayil Nee,Chila Chilambuyo Poonkuyilae (O Koel..did you shake the bent branch of the tree ?..)
కోయిలా ఆమనీ రాగం అందుకో.. నాద స్వరము వలె...

Manchinavilaee, Marayoliyae Thediyathiyo Poorangal (Did the festivities arrive with the flames of the mud lamps ?)
మంజీరాలే.. మదిలోన మారుమ్రోగి.. పులకింతలు రేపగా...

Swasthi Swasthi Su Muhurtham, (On this very auspiciousness occasion )
స్వస్తి స్వస్తి సుముహుర్తం..
Sumungali Bhava Manavatti (O Bride..,May you be blessed with a long wedded life)
సుమంగళి భవ.. మానవతి..

Aaromalae… Aaromalae…. (O Beloved….O Beloved….)
ప్రియతమా... ప్రియతమా... ప్రియతమా... ప్రియతమా...!!!

Kadalinae, Karayodiniyum Padan Sneham Undo ? (Does the sea still possess the love to serenade the shore ?)
కడలికి క్షణమైనా దరి చేరే స్నేహముందా??
Mezhukuthurikalayi Urukan Iniyum Praanayam Manasil undo ? (Is there still love in the mind..for melting like candle wax ?)
మంచునైనను మరిగించు ప్రణయం .. మనసునుందా...??
Aaromalae.. Aaromalaeee.. Aaromalaee (O Beloved….O Beloved…O Beloved…..O Beloved…)
ప్రియతమా... ప్రియతమా... ప్రియతమా...

Aaromalae.. Ohh.. Ho ! (O Beloved….)
ప్రియతమా...ఓహ్ హో ...!!!

Tuesday, March 1, 2011

ఎంత పని చేస్తివిరో రామలింగరాజా!!

రూపవతి, గుణవతి, శీలవతి అయిన భానుమతిని పెళ్ళిచూపులు చూడటానికి తిరుపతి బయలుదేరాడు సాఫ్ట్‍వేర్ ఇంజనీర్ అయిన రఘుపతి. హడావుడిగా పెళ్ళిచూపులు ఏర్పాటు చేసి, తాను ఉద్యోగంలో చేరిన తరువాత మొదటిసారి రెండో క్లాసులో ప్రయాణించేలా చేసిన పేరయ్యను మనసులో తిట్టుకుంటూ రైలెక్కాడు. రైలులో పిజ్జాలూ, బర్గర్లు దొరకవన్న విషయం స్ఫురించి, కనీసం మినరల్ వాటర్ అయినా కొనుక్కుందామని ప్లాట్‍ఫాం పైకి వచ్చాడు.
వేళ కాని వేళలో వచ్చే Windows error శబ్దంలా కర్ణకఠోరంగా వినపడిన పిల్లవాడి ఏడుపు విని అటువైపు దృష్టి సారించాడు. పిల్లవాడిని సముదాయించడానికి ప్రయత్నిస్తున్న యువతిని చూడగానే Youtube వీడియోలా అతని ఫ్లాష్‍బ్యాక్ లోడ్ అవ్వడం మొదలు పెట్టింది. అది పూర్తి అయ్యేవరకు అక్కడే ఉంటే రైలు తప్పిపోయే ప్రమాదం ఉందని గ్రహించి, రైలెక్కి గతంలోకి వెళ్ళాడు.
అవి అతను ఉద్యోగంలో కొత్తగా చేరిన రోజులు. Broadband ఇంటర్నెట్ లాగా చురుగ్గా ఉండేవాడు. అయిదంకెల జీతాన్ని, అదుపులేని జీవితాన్ని ఆనందంగా ఆస్వాదించేవాడు. అలా ఉండగా ఒకరోజు పని ముగించుకుని ఇంటికి చేరుకున్న రఘుపతితో యధావిధిగా పెళ్ళి ప్రస్తావన తీసుకొచ్చారు తల్లిదండ్రులు.
రఘుపతి "లెట్ మీ ఎంజాయ్ డాడీ!!" అంటూ తప్పించుకోవాలని ప్రయత్నించాడు. అతని తల్లి "పాతికేళ్ళు మీద పడ్డాయి. ఎంతకాలం ఇలా ఒంటికాయ సొంటికొమ్ము జీవితం...." అంటూ నచ్చచెప్పబోయింది. రఘుపతి ఇక తప్పేది లేక "సరే మీ ఇష్టం. ఎలాగో పెళ్ళికి ముందు ట్రైనింగూ, పెళ్ళి తరువాత ఫైరింగూ ఉండదంటున్నారు కాబట్టి కనీసం ట్రయల్ అయినా దొరికేటట్లు చూడండి." వెంటనే అతని తండ్రి " అరిగిపోయిన చెప్పు అప్పు తెచ్చి మరీ కొడతాను, ఇలాంటి పైత్యపు వాగుడు వాగావంటే.." అంటూ మండిపడడంతో ఇక వారితో వాదించడం ప్రమాదమని గ్రహించి, భవిష్యత్తులో భార్యను అప్‍గ్రేడ్ చేసుకోవడం అసాధ్యమని స్ఫురించి, తనకు కావలసిన లక్షణాలను ముందుగానే గుర్తించి పెళ్ళికూతురికి ఒక Configuration ను తయారుచేసాడు.
"అయితే సరే! నాకు కాబోయే భార్యకు కావలసిన Configuration చెబుతా వినండి."
అతని తండ్రి దానికి "ఏమిటా బోడి Configuration??" అన్నాడు. అతను వెంటనే జేబులోనుంచి ఒక printout తీసి చదవడం మొదలు పెట్టాడు. "వీకీపీడియా లాంటి తెలివితేటలు, గూగుల్ లాంటి చురుకుదనం, ఆర్కుట్ లాంటి కలుపుగోలుతనం, Apple Mac లాంటి అందం, Touch Screen లాంటి సున్నితత్త్వం ..." అంటూ చదువుతుంటే తల్లిదండ్రులు విస్తుపోయారు. వీడి మెదడుకు ఏదో వైరస్ సోకిందని భయపడ్డారు.
వీడి గొంతెమ్మ కోర్కెలను తీర్చే సామర్ధ్యం అల్లాటప్పా పేరయ్యలకు ఉండదని ఖర్చు ఎక్కువైనా హైటెక్ పేరయ్యకు ఈ పని అప్పగించారు. అతను గూగుల్ లో ముల్లోకాలు (కోస్తా, తెలంగాణా, రాయలసీమ) గాలించి కొన్ని సంబంధాలను తెచ్చాడు. వాటిలో రఘుపతి చూసిన మొదటి సంబంధం పద్మావతి. పెళ్ళిచూపుల్లో ఇరుపక్షాల పెద్దలకీ అన్ని విషయాలూ నచ్చాయి. పద్మావతిని ఏకాంతంగా మాట్లాడేందుకు తీసుకెళ్ళిన రఘుపతి తనతో ఛాటింగ్ కు రమ్మని ఆహ్వానించాడు. కానీ ఆమెకు e-mail id లేదని తెలియడంతో అగ్గి మీద గుగ్గిలంలా మండిపడి సంబంధాన్ని నిరాకరించాడు. ఇందాక ప్లాట్‍ఫాం మీద చంటి పిల్లాడితో కనిపించిన యువతి ఈ పద్మావతేనని గుర్తు చేసుకుంటూ వర్తమానంలోకి వచ్చాడు.
ఆ రోజు పద్మావతితో మొదలైన రఘుపతి పెళ్ళిచూపుల మహాప్రస్థానం నేటి వరకూ నిరాటంకంగా కొనసాగుతూనే ఉంది. ఎంతమందిని చూసినా ఏదో ఒక బగ్ పట్టుకుని నిరాకరించడం అతనికి పరిపాటి అయిపోయింది. ఇలా ఎన్ని సంబంధాలు చూసాడంటే కొన్ని సార్లు పెళ్ళిచూపులకు వెళ్ళిన తరువాత ఆ సంబంధం ఇదివరకు చూసినదే అని తెలిసి వెనుదిరగవలసి వచ్చేది. ఇక ఈ రోజైనా తన configuration ఉన్న పిల్ల దొరకాలని ఆ ఏడుకొండల వాడిని స్మరిస్తూ తిరుపతిలో అడుగుపెట్టాడు.
యధావిధిగా స్వాగత సత్కారాల తర్వాత పెళ్ళిచూపుల తతంగం ప్రారంభం అయ్యింది. గతంలో జరిగిన పెళ్ళిచూపుల్లో గడించిన అనుభవసారాన్నంతా రంగరించి ఒక ప్రశ్నావళిని తయారుచేసుకున్నాడు రఘుపతి. అందులో మొదటి ప్రశ్నను పెళ్ళికూతురు మీదకు నేరుగా సంధించాడు. "భార్యాభర్తల మధ్య దాంపత్యం ఎలా ఉండాలి?" దానికి ఆమె ఏమాత్రం తడబడకుండా "భార్యాభర్తల మధ్య సంబంధం RAMకి హార్డ్‍డిస్క్‍కీ ఉన్నట్లు అన్యోన్యంగా ఉండాలే కానీ డెస్క్‍టాప్ - పెన్‍డ్రైవ్ లాగా ఉండకూడదు." అని సమాధానం చెప్పింది భానుమతి. ఈ సమాధనం విన్న రఘుపతి ముఖం19" Monitor లాగా ఆనందంతో వెలిగిపోయింది. 3D గ్రాఫిక్స్‍తో creative woofers లోని మంగళవాయిద్యాలతో భానుమతితో తన పెళ్ళి సీను కళ్ళముందు కదలాడసాగింది. డ్యుయెట్‍కు ఇదే తరుణమని OnSiteకి వెళ్ళబోతుండగా ఇంగ్లీషు సరిగా మాట్లాడడం రాని పిల్ల ఇంత చక్కగా computer terminology ఎలా వాడిందా అని అనుమానం కలిగింది. దాని వెనుక పేరయ్య హస్తం ఉందని గ్రహించాడు. తన చేయి ఎప్పుడూ పైనే ఉండదనీ, స్టాక్ మార్కెట్ లా పడిపోవచ్చనీ ఊహించలేని రఘుపతి ఈ సంబంధాన్నీ నిరాకరించాడు.
ఆ పిమ్మట ఆర్ధిక మాంద్యం (Recession) రావడమూ, రఘుపతికి పెళ్ళివయసు దాటిపోవడం ఏకకాలంలో జరిగడంతో deadline దాటిన ప్రాజెక్టులా రఘుపతి మార్కెట్ విలువ పడిపోయింది. ఇక configuration విషయంలో రాజీకి సిద్ధపడినా పిల్లనివ్వడానికి ఎవరూ అంగీకరించకపోవడంతో రఘుపతి వాళ్ళ తల్లిదండ్రుల గుండెల మీద సెకండ్ హ్యాండ్ P 2 సిస్టం లా తయారయ్యాడు
ఇంతలో ఇంటర్నెట్ లో వెతుకుతున్న ఫైల్ డెస్క్‍టాప్ మీద దొరికినట్లు తనకు కావలసిన లక్షణాలు గల ఇందుమతి ఎదురింట్లో ఎదురయ్యింది. నేరుగా వెళితే అంకుల్ అంటుందేమో అన్న భయంతో వాళ్ళ తల్లిదండ్రులవైపు నుంచి నరుక్కురావడం మొదలుపెట్టాడు. ససేమిరా అంటున్న ఇందుమతి తండ్రి శ్రీపతిని కాళ్ళావేళ్ళా పడి, ఒబామా లా ఆశ చూపించి ఎట్టకేలకు పెళ్ళికి ఒప్పించాడు.
పెళ్ళి కుదిరిందన్న ఆనందంలో మదర్ బోర్డంత మంటేసి, కీ బోర్డంత పీటేసి, Apple iphone రిలీజ్ అంత వైభవంగా తన పెళ్ళి జరుగుతున్నట్లు Adobe Photoshopలో కలలు కనడం మొదలుపెట్టాడు. అయితే నిశ్చితార్ధం కుదిరాక సత్యం కుంభకోణం బయటపడడంతో P 2 సిస్టం మీద వైరస్ ఎటాక్ అయినట్లు తయారయింది అతని పరిస్థితి. Microsoft కంటే సత్యం లో పనిచేయటమే గొప్పని భావించే సగటు సిటీ వాసుడు శ్రీపతికి సాఫ్ట్‍వేర్ మీద అభిప్రాయం చెడి, రఘుపతి కన్నా ఏ గుడి పంతులకో, బడి పంతులకో ఇచ్చి పెళ్ళి చేయటం మేలని భావించి పెళ్ళిని Preempt చేసాడు. ఎంత పని చేస్తివిరో రామలింగరాజా... అనుకుంటూ రఘుపతి కూలబడ్డాడు.

- చైతన్య, హరిప్రసాద్

Thursday, April 15, 2010

all of a sudden గా రాయాలనిపించింది ఇలా...!!!

నా జీవితం లో మరిచిపోలేనివి నేను బెంగళూరులో చదువుకున్న రోజులు. వంద సంవత్సరాల చరిత్ర ఉన్న కాలేజి లోఅనూహ్యం గా చేరాను. అక్కడికి వచ్చే వాళ్ళంతా పుస్తకాల పురుగులే, అలాంటి వాళ్ళ మధ్య నేను ఏమయి పోతానో అనుకుంటూ అడుగు పెట్టాను. నా అంచనాలు తారుమారు అయ్యి ఆ రెండు సంవత్సరాలూ ప్రతి రోజు పండుగ లా గడిచాయి.. చదువు మా జీవితం లో కేవలం ఒక (చిన్న) భాగం మాత్రమే అయ్యింది... దానికి కారణం... మా క్లాస్ లోని తెలుగుమూక (వేరే పదం దొరక్క కాదు. మా వాళ్ళు నిజం గానే కోతుల మూక,ఎక్స్ట్రా గాళ్ళతో కలిపిన క్రికెట్ టీం సైజు) ఆటలు, పాటలు, జోకులు, సరదాలు, సాంస్కృతిక కార్యక్రమాలు, అర్థ రాత్రి దాక Lab లో సినిమాలు... షికార్లు.. నిజంగా.. Golden period….అనేది చాలా చిన్న పదం అవుతుంది... అలాంటి నా కాలేజి రోజుల్లోని ఈ అనుభవం మీ కోసం...

మా బ్యాచ్ లో చాలా మందికి కామన్ గా వున్న ప్రాబ్లం గర్ల్ ఫ్రెండ్ ... కామన్ అంటున్నాడు... ఒకటే గర్ల్ ఫ్రెండా.. అని అనుమానం గా చూడకండి... గర్ల్ ఫ్రెండ్ వుంటే ప్రోబ్లమ్స్ అనే వాడిని... గర్ల్ ఫ్రెండ్ లేదన్నదే మా బాధ.. ఎంత కరువు లోవుండే వాళ్ళమంటే C గ్రేడ్ అమ్మాయిలకు కూడా డిస్టింక్షన్ వేసే వాళ్ళం.... దానికి తోడు మేమంతా నక్క తోక మీద బ్రేక్ డాన్సు చేసామా అనిపించేలా... మా క్లాసు లో ఒక్క పోరి కూడా లేదు... వున్న ఇద్దరిలో ఒకరు ఆంటీ.. ఒకరు ఆంటీలాంటి...

మీకు ఒక (ఈ కధకు ) ముఖ్యమైన వ్యక్తి ని పరిచయం చేస్తాను. (background లో TV9 మ్యూజిక్ మీరు
వేసుకోండి...) పేరు నవీన్.. చూడటానికి బాగానే వున్నా ఏ అమ్మాయి కంటికీ (ఇప్పటి దాకా) అలా కనపడలేదు పాపం... మీకు కంప్యూటర్ సైన్స్ లో “విందు చేస్తున్న వేదాంతులు” (dining philosophers) గురించి తెలుసా?? అందులోఒక వేదాంతి వీడు... తినడం,ఆలోచించడం వీడి జీవితం లోని ముఖ్యమైన కార్యక్రమాలు. ad break లో గర్ల్ ఫ్రెండ్ దొరకలేదు అని భాధ పడటం. వాడి జీవితంలోని ఎన్నో ప్రేమకథల్లోంచి మచ్చుకు ఒకటి వాడి మాటల్లోనే...
"నేను ఇంజనీరింగ్ లో వుండగా… డ్రాయింగ్ క్లాస్ జరుగుతోంది... ఒక అందమైన అమ్మాయి.. నా పక్క టేబుల్ దగ్గరకు వచ్చింది... చూపు చూపు కలిసింది.. తన పెదవులపై చిన్న నవ్వు మెరిసింది... నేను కూడా చిన్న నవ్వు (ఓ 20 బయటపెట్టి) వదిలా.. నాకు దగ్గర గా వచ్చింది... నా గుండె వేగం గా కొట్టుకోవడం మొదలయింది... వచ్చి మీ దగ్గర eraser వుందా అంది... నేను ప్రేమగా.. లేదు అన్నాను... తను వెళ్ళిపోయింది...."
"ఆ తరువాత...."
"అంతే అయిపొయింది స్టొరీ..."
(అవాక్కయ్యారా..?? in front crocodile festival... గిన్నీసు రికార్డులను తల దన్నే ఇలాంటి అతి చిన్న love స్టోరీస్ మా వాడి దగ్గర చాలానే వున్నాయి..)
ఒక చాలా అందమైన.... వద్దులే.... ఒక అందమైన.... సర్లే...... ఒక అమ్మాయిని ప్రేమలో పడేలా చెయ్యటం.. మా వాడి జీవితాశయం. అదీ క్లుప్తం గా మా నవీన్ గాడి గా(భా)ధ. అలా ఎడారి లాంటి మా నవీన్ జీవితం లో సింధు అనే సునామీ వస్తుందని ఎవరు ఊహించలేదు... (సింధు కూడా...!!!)

ఒక రోజు క్లాస్ అయిపోయాక ల్యాబ్ కి వెళ్లి (ఎప్పటి లాగే) ఆలోచిస్తూ.. ఆర్కుట్ తెరిచాడు.. ఇవ్వాళ అనుకోని పరిచయాలు కలుగుతాయి అన్న జోస్యం చూసి అది నిజమవుతుందేమో అని లేడీస్ హాస్టల్ మీదుగా వచ్చాడు... గూగుల్ వాళ్ళ సమాచారం ఇంకా వీళ్లకు అందలేదనుకుంటా... అని సరిపెట్టుకొని... బాలకృష్ణ సినిమా రిలీజ్ రోజు చూసిన వాడిలా మొహం వాడేసుకోని జ్యూస్ సెంటర్ చేరాడు.
అలా జ్యూస్ తాగుతూ ఆలోచిస్తూ ఉండగా ఎక్కడినుంచో “ఆవారా హున్.. ఆవార హున్....” అంటూ పాట వినపడింది. ఎవడో ఆవారా గాడు అనుకుంటూ చుట్టూ చూశాక అర్థం అయింది అది వాడి మొబైల్ రింగ్ టోనే అని. ఏదో తెలియని నెంబరు కావడంతో ఫోన్ ఎత్తి హలో అన్నాడు. అటు వైపు ఒక నాజూకైన స్వరం పలికింది. “హలో... సర్ నేను ఐసిఐసిఐ నుంచి మాట్లాడుతున్నాను.. మీకు లోన్ ఏమైనా కావాలా...??”. అసలే గూగుల్ చేతిలో మోసపోయి ఉన్నాడేమో ఆ బాధ మా వాడిలో కోపం గా రూపాంతరం చెందింది. “మీకు అసలు నా నెంబర్ ఎవరు ఇచ్చారు?” అన్నాడు. “మాకు ఒకడు ఇచ్చేదేంటి సార్ మేమే తీసుకుంటాము.. ఇంతకీ మీకు లోన్ కావాలా వద్దా..??" వీళ్ళు అప్పు ఇవ్వడానికి చేశారో.. వసూలు చేయడానికి చేశారో.. అర్ధం కాక ఒక సెకను (అలియాస్ ఒక్క నిముషం) ఆలోచన లో పడ్డాడు. మొత్తానికి తేరుకొని.. “ఉప్పు లేక పోతే పప్పు చప్పగా తినచ్చు గాని అప్పులు చేసి ముప్పులు తెచ్చుకునే తప్పులు చెయ్యద్దన్నారండి నాన్నగారు...!!!” “…. సార్ కొంచెం తెలుగు లో చెబుతారా ??” ఇంకమా వాడికి చిర్రెత్తుకొచ్చి.. చంటబ్బాయి లో చిరంజీవి లా... “వద్దు.. వద్దు.... వద్దు.... వద్దు..... “ అని అరిచాడు.. రెండో సారి వద్దు చెప్పేసరికే ఫోన్ కట్ చేసిన సంగతి అర్ధమయ్యి.. నిదానించాడు. షాప్ వాడు వీడి అరుపులు విని తీసుకు వచ్చిన జ్యూస్ ని తీసుకువెళ్లిపోయాడు. మళ్ళీ వాడిని ఏదోలా బతిమాలి తీసుకొని తాగి అలవాటు గా 500 నోటు ఇచ్చాడు. షాప్ వాడు కూడా పై నుంచి కిందకు ఒక చూపు చూసి (అలవాటు గా) account లో రాసుకున్నాడు.

అక్కడ నుంచి బయలుదేరుతుండగా “ఆవారా హున్..” పాట మళ్ళీ వినిపించింది. (మీకు చెప్పక్కరలేదు కదా పాట ఎక్కడి నుంచి వచ్చిందో!!).. మళ్ళీ తెలియని నెంబరు.. మనకు తెలియని నెంబర్లకు మన నెంబరు మాత్రం ఎలా తెలుస్తుందో ఆలోచించబోయి.. ఆగి.. ఫోన్ ఎత్తాడు.
అటు : “హలో!!..నేను...”
ఇటు : “హలో!! ఎవరు.. సరిగ్గా వినిపించడం లేదు “
అటు : “హలో నవీన్.. నేను సింధూని !!!”
ఇటు : “ఎవరూ?? !!”
అటు: “నేను సింధూని.. తిరుపతి లో నేను మీ పక్క ఇంటిలో వుంటాను.. “

ఫ్లాష్ బ్యాక్ లో మన నవీన్ ఇంటికి వెళ్ళినప్పుడు ఆ అమ్మాయిని ఓర చూపులు చూశాడు లెండి.. (అంత కంటే ఏమీ చేసే ధైర్యం చాలక.. ) కానీ ధైర్యశాలి అయినా తమ్ముడు ఉండటం వల్ల ఆ అమ్మాయి ఇంజనీరింగ్ చేసి బెంగళూరు లోనే ఉద్యోగం చేస్తోందని తెలుసుకోగలిగాడు.

ఇటు: “ఎవరు మీరు నిజం చెప్పండి...”
అటు: “నేను సింధూని.. మీ పక్క ఇంటి లో వుండే అమ్మాయిని..”
మా వాడి క్రిమినల్ మెదడు ఆలోచించడం మొదలు పెట్టింది.. అసలు ఈ అమ్మాయి గురించి మా ఫ్రెండ్స్ ఎవరికి చెప్పలేదు.. (నిజానికి చెప్పిన విషయం గుర్తు లేదు...) ఎవరో ఆట పట్టిస్తున్నారా అన్న అనుమానం వచ్చింది...
ఇటు: “మీరు ఎవరో నిజం చెప్పండి... నా నెంబరు ఎలా వచ్చింది మీ దగ్గరకు ??”
అటు: “ నేను నిజం గానే సింధూని. మా ఫ్రెండ్స్ మీ కాలేజీ చూడాలనుకుంటున్నారు... అందుకని మీ నాన్న గారి దగ్గర ఈ నెంబరు తీసుకున్నాను...”

మా వాడు కచ్చితంగా ఇది నిజమైన కాల్ అని పూర్తిగా నమ్మేశాడు.. కారణం ఆడపిల్లలు ఏదో ఒక పని లేకుండా చెయ్యరు.. అనే వాడి లాజిక్.. (లాజిక్ బానే వుంది కానీ పాపం వాడి టైమే..).. నిజానికి తను కాలేజీ కాదు వాడిని చూడటానికే రావాలనుకుంటుందని మా వాడు కనిపెట్టేశాడు, పవన్ కల్యాణ్ ఎప్పుడో చెప్పాడుగా ఆడువారి మాటల గురించి...

అంతలో airtel అనే గ్రహానికి వాడు శాంతి చేయించడం మరిచిపోవడం వల్ల ఆ కాల్ కట్ అయ్యింది..
రెండు యుగాలు (మనకి నిముషాలు) గడిచాక మళ్ళీ ఆవారా రాగం వినిపించింది అదే నెంబర్ నుంచి...
మా వాడు అత్యుత్సాహం తో వెంటనే “ఆ చెప్పు సింధు.. !!! “ అన్నాడు. అటు నుంచి ఏవో నవ్వులు వినిపించాయి. నా రాణిని చెలికత్తెలు ఆట పట్టిస్తున్నట్లున్నారు అని మా వాడు మురిసిపోయాడు.
అయినా ఏ మూలనో ఉన్న పెనుభూతం వల్ల “నువ్వు ఎక్కడ వుంటున్నావు?? “ అని అడిగాడు. అటు నుంచి చిన్న తటపటాయింపు తరువాత, “మారతాహళ్లి” అంది. మా వాడికి తెలిసిన software engineers అందరూ అక్కడే వున్నారు.. ఈ అమ్మాయి కూడా అదే పేరు చెప్పడం తో ఇంక ఆ భూతాన్ని భూమి లో కిలోమీటర్ లోతున పాతి పెట్టేశాడు.
అటు: “మీ కాలేజీ చూడటానికి ఎప్పుడు కుదురుతుంది ??”
ఇటు: “మీరు ఎప్పుడంటే అప్పుడే.. మా కాలేజీ లో నేను చెప్పిందే వేదం..!! “ (గమనించారా మా వాడు build up లు ఇవ్వడం మొదలు పెట్టేశాడు )
అటు: “అయితే రేపు రావచ్చా??
ఇటు: “తప్పకుండా.. అయినా రేపు శుక్రవారం కదా!! మీకు శెలవా?? “
అటు: “ఓ సారీ... మీ తో మాట్లాడుతుంటే అన్నీ మర్చిపోతున్నాను!!“
అయిపోయింది.. ఈ డైలాగ్ కి మా వాడి దిమ్మ తిరిగి పోయింది.. doubt లేదు.. ఈమె నా జీవిత భాగస్వామి.. బెంగళూరు లో తక్కువ రేటు కి ఎక్కువ చదువు చెప్పే మంచి స్కూల్ ఏంటో కనుక్కోవాలి.. మా పిల్లల్నిచేర్చేందుకు... అంటూ ఆలోచించడం మొదలు పెట్టేశాడు.. (ఆలు లేదు చూలు లేదు.. కొడుకు స్కూలు St Joseph’s అనే సామెత ఏమైనా గుర్తుకు వచ్చిందా మీకు... మీ తప్పు లేదు..)
అటు: “ఈ శనివారం మీ కాలేజీ కి వస్తాం అయితే.. సరేనా.. ఉంటాను..”
నో నో నో... ఈ అమ్మాయి ఫోన్ పెట్టేస్తోంది.. తన మనసులో మాట బయట పెట్టకుండానే.. మా వాడి హృదయం భాధ తో మూలిగింది.. ఎలాగైనా ఆపాలి...
ఇటు: “ఆ సింధు...”
అటు: “ఆ.. ఏంటి?”
ఇటు: మనసు లోని ప్రేమనంతా రంగరించి “all of a sudden గా ఎందుకిలా??”
ఇంక నవ్వు ఆపుకోవడం మా వల్ల కాలేదు... ఫోన్ కి అటు వైపు వున్న మేము.. కాల్ కట్ చేసి కిందా మీదా పడి నవ్వాం.. నిజానికి ఈ ఫోన్ చేసింది మా లో మిమిక్రీ వచ్చిన ఒక అబ్బాయి. ఆ అబ్బాయి కొత్త ఫోన్ తీసుకున్న విషయం.. వాడికి మిమిక్రీ వచ్చిన విషయం మా నవీన్ కి తెలియకపోవడం మాకు కలిసొచ్చింది. శనివారం గేట్ దగ్గర ఎదురు చూస్తున్న మా నవీన్ కి మా entry చిన్న హార్ట్ ఎటాక్ నే ఇచ్చింది. అయినా తేరుకొని మా నవ్వుల తో వాడి నవ్వు కలిపేశాడు.. (ఏడవలేక)..

నా తొలి టపా..

గమ్యం ఎరుగని నా ప్రయాణానికి సంకేతం చిరునామా లేని నా ఈ టపా...